Sign In 
កូរ៉េខាងត្បូង ៖ ក្រុមហ៊ុនគ្រប់គ្រងរបស់ក្រុមចម្រៀងនារីកូរ៉េ BlackPink បាននិយាយថា BlackPink ក្លាយជាតារាចម្រៀងដែលមានអ្នកគាំទ្រលើ YouTube ច្រើនជាងគេលំដាប់ទី៤ លើពិភពលោក។
ផលិតកម្ម YG Entertainment បានប្រកាសថា ចំនួនអ្នក Subscribe លើ Channel YouTube ផ្លូវការរបស់ក្រុម BlackPink លើសពី៤៤លាននាក់គិតត្រឹមម៉ោង៩ព្រឹក ថ្ងៃអាទិត្យ។ មានតែសិល្បករបីរូបផ្សេងទៀតទេ ដែលរួមមាន Justin Bieber, DJ Marshmello និង Ed Sheeran មានអ្នក Subscriber ច្រើនជាងហ្នឹង។ បើគិតក្នុងចំណោមតារាចម្រៀងស្រីវិញ BlackPink គឺឈរនៅលើលំដាប់ទីមួយ លើតារាងអ្នកមាន Subscriber លើ YouTube ច្រើនជាងគេ។
Channel YouTube របស់ BlackPink ជាមធ្យមមានអ្នក Subscribe ថ្មី ១សែននាក់ ជារៀងរាល់ថ្ងៃ តាំងពីចេញបទថ្មី How You Like That នៅថ្ងៃទី២៦ ខែមិថុនា។
វីដេអូបទចម្រៀងនេះ ត្រូវបានគេចុចមើលដល់ទៅ ១០០លានដង ត្រឹមតែរយៈពេល៣២ម៉ោងដំបូងតែប៉ុណ្ណោះ ដែលបានបំបែកកំណត់ត្រារបស់បទ Boy With Luv ដែលច្រៀងដោយក្រុមតារាចម្រៀងប្រុស BTS នៅខែមេសា ឆ្នាំ២០១៩៕ ដោយ៖ ត្នោត
