Sign In 
អ្នកប្រហែលជាធ្លាប់បានអាន ឬទស្សនាឃើញខ្សែជីវិតរបស់នាយកប្រតិបត្តិធំៗជុំវិញពិភពលោកជាច្រើនមកហើយ តែក្រៅពីជីវិតដ៏ជោគជ័យ និងគួរឲ្យគោរព មាននាយកប្រតិបត្តិមួយចំនួនក៏បានធ្លាក់ខ្លួនបរាជ័យក្រោកឡើងវិញមិនរួចដែរ ។
ខាងក្រោមគឺជានាយកប្រតិបត្តិធំៗដែលបានធ្លាក់ខ្លួនបរាជ័យ និងមេរៀនដែលអ្នកអាចរៀនសូត្រពីអ្នកទាំងនេះបាន ៖
១. លោក ហាវី វ៉ាញស្ទីញ (Harvey Weinstein)
នាយកប្រតិបត្តិរបស់ក្រុមហ៊ុន The Weinstein Comapny នេះត្រូវបានចោទប្រកាន់ពីបទបំពានផ្លូវភេទអស់រយៈពេលជាច្រើនឆ្នាំរហូតដល់ឆ្នាំ ២០១៧ ដែលបង្កឲ្យមានចលនាប្រឆាំងនឹងការបំពានផ្លូវភេទស្ត្រីដ៏ធំក្នុងសហរដ្ឋអាមេរិក ។ មេរៀនសំខាន់ដែលអ្នកអាចរៀនសូត្របានពីការបរាជ័យរបស់លោក វ៉ាញស្ទីញ នេះគឺមិនមានអំពើអាក្រក់ដែលអាចត្រូវបានលាក់បាំងបានទេក្នុងសង្គមបច្ចុប្បន្ននេះមិនថាអ្នកជាអ្នកមាន ឬមានឥទ្ធិពលប៉ុនណាឡើយ ។
២. លោក រីឆាត ស្មីត (Richard Smith)
លោកមហាសេដ្ឋីម្នាក់នេះធ្លាប់ជានាយកប្រតិបត្តិរបស់ក្រុមហ៊ុន Equifax ដែលត្រូវបានចោទប្រកាន់ពីការអសមត្ថភាពក្នុងការការពារទិន្នន័យរបស់អតិថិជនរបស់ខ្លួនដែលបង្កឲ្យមានការលួចទិន្នន័យហិរញ្ញវត្ថុ និងទិន្នន័យផ្ទាល់ខ្លួនរបស់មនុស្សចំនួន ១៤៣លាននាក់ក្នុងសហរដ្ឋអាមេរិក ។ អ្នកដឹកនាំក្រុមហ៊ុន និងអាជីវកម្មដទៃអាចរៀនសូត្រពីលោកទាក់ទិននឹងការប្រុងប្រយ័ត្នផ្នែកទិន្នន័យ ព្រមទាំងការទទួលខុសត្រូវរាល់ពេលដែលបានប្រព្រឹត្តខុសផងដែរ ។
៣. លោក ស្កត ថមសាន់ (Scott Thompson)
លោកធ្លាប់ជានាយកប្រតិបត្តិរបស់ក្រុមហ៊ុន Yahoo ដ៏ធំ និងត្រូវបានចោទប្រកាន់ថាក្លែងបន្លំបរិញ្ញាប័ត្រវិទ្យាសាស្ត្រកុំព្យូទ័រលើប្រវត្តិរូបសង្ខេបរបស់ខ្លួន ។ ជាក់ស្តែង តាមសមត្ថភាពរបស់លោក លោក ថមសាន់ មិនមានការលំបាកខ្លាំងទេក្នុងការទទួលបានតំណែងខ្ពង់ខ្ពស់ក្នុងក្រុមហ៊ុន តែលោកបែរជាជ្រើសរើសការកុហកទៅវិញ ។
៤. អ្នកស្រី អេលីហ្សាបេត ហូមស៍ (Elizabeth Holmes)
អតីតនាយកប្រតិបត្តិរបស់ក្រុមហ៊ុន Theranos រូបនេះបានបោកប្រាស់មនុស្សអស់រាប់លានដុល្លារដោយកុហកថា អ្នកស្រីបានស្រាវជ្រាវឃើញបច្ចេកវិទ្យាវេជ្ជសាស្ត្រថ្មីមួយ ។ ប៉ុន្តែបច្ចេកវិទ្យានោះមិនដែលមានរូបរាងពីមុនមកទេ ហើយតាំងពីពេលនោះមក អ្នកស្រីត្រូវបានចោទប្រកាន់ពីបទព្រហ្មទណ្ឌជាច្រើន ៕ ផ្តល់សិទ្ធដោយកោះសន្តិភាព
