Sign In 
លោកកេត ម៉ៅ អភិបាលស្រុកសំរោងបានអោយដឹងថា គិតត្រឹមថ្ងៃទី២២ សីហា នេះ ព្រះសង្ឃចំនួន២៨អង្គដែលមានជំងឺនោះ លើកទីមួយនេះ ខាងក្រសួងសុខាភិបាលបានយកកំហាកទៅពិនិត្យរួចហើយ គឺមិនមានពាក់ព័ន្ធនឹងជំងឺកូវីដ១៩នោះឡើយ ខណៈគ្រាន់តែជាជំងឺផ្តាសាយធម្មតាប៉ុណ្ណោះ ។
លោកបន្តថា នៅថ្ងៃនេះដែរ ខាងមន្ទីរសុខាភិបាលមិនបានធ្វើចត្តាឡីសក្តឡើយ ។ ហើយក្នុងព្រះសង្ឃ២៨អង្គនោះ គឺបានជាពីជំងឺ១៨អង្គហើយ ដោយមានក្រុមគ្រូពេទ្យនៅប្រចាំការក្នុងវត្តនោះ ដើម្បីបន្តធ្វើការតាមដានពិនិត្យ និងណែនាំដល់ព្រះសង្ឃទាំង១០អង្គនេះឱ្យធ្វើអនាម័យ និងពាក់ម៉ាស់ឱ្យបានជាប់ជាប្រចាំ ។
សូមបញ្ជាក់ដែរថា លោកកេត ម៉ៅ អភិបាលស្រុកសំរោងក៏បានប្រាប់កោះសន្តិភាពយើងអោយដឹងថា ករណីព្រះសង្ឃ២៨អង្គ នៅវត្តប្រាសាទនាងខ្មៅ ស្ថិតក្នុងភូមិចា ឃុំរវៀង ស្រុកសំរោង ខេត្តតាកែវ គឺគ្រាន់តែមានជំងឺផ្ដាសាយឆ្លងតាមគ្នាប៉ុណ្ណោះ សូមប្រជាពលរដ្ឋ និងអ្នកប្រើប្រាស់បណ្តាញសង្គម កុំមានការភ្ញាក់ផ្អើល។
ក្រោយពីទទួលបានព័ត៌មាន ពាក់ព័ន្ធនឹងព្រះសង្ឃ២៨អង្គ នៅវត្តនាងខ្មៅខាងលើនេះ លោកស្នងការរងផែនការងារសន្ដិសុខខេត្តតាកែវ សហការជាមួយអាជ្ញាធរពាក់ព័ន្ធចុះដល់ទីតាំងវត្តនោះ ដោយលទ្ធផលពិនិត្យឃើញថា៖ ព្រះសង្ឃដែលមានជំងឺផ្ដាសាយ សរុប ចំនួន២៨អង្គ អាជ្ញាធរស្រុកបានស្នើសុំឲ្យគង់នៅក្នុងគុដិដោយឡែក និងពួកគាត់ត្រៀមខ្លួនសហការ តាមជំនាញរបស់មន្ទីរសុខាភិបាល។
លោកអភិបាលស្រុកបានបន្តទៀតថា បើតាមដំណើររឿងគឺ ព្រះចៅអធិការវត្ត និងព្រះសង្ឃផ្សេងទៀត មានអាការៈផ្ដាសាយ នៅយប់ថ្ងៃទី១៨ សីហា ២០២០ ហើយទៅព្យាបាលនៅផ្ទះគ្រូពេទ្យជាប់វត្ត ដែលជាគ្រូពេទ្យប្រចាំជាបន្តបន្ទាប់ ហើយគ្រូពេទ្យមិនយកថវិកា ទើបចៅអធិការវត្តប្រាសាទនាងខ្មៅ បានបង្ហោះសារក្នុងបណ្ដាញសង្គម ថ្លែងអំណរគុណដល់គ្រូពេទ្យ ហើយប្រជាពលរដ្ឋក៏យកព័ត៌មានដែលចៅអធិការវត្តបង្ហោះនោះ ផ្សព្វផ្សាយបន្តគ្នា ធ្វើឲ្យមានភាពភ្ញាក់ផ្អើល រហូតមានការទំនាក់ទំនង ចូលទៅលេខ ១១៥ សុំអន្តរាគមន៍ ចុះពិនិត្យតែម្តង។
គិតត្រឹមម៉ោង០៧៖០០ព្រឹក ថ្ងៃទី២០សីហា ស្ថានភាពរបស់ព្រះសង្ឃទាំង២៨អង្គរនោះមានអាការះធូរស្បើយវិញហើយ តែខាងមន្ទីរសុខាភិបាលខេត្តបានដាក់ពេទ្យអោយនៅប្រចាំការមើលពីស្ថានភាពជំងឺនៅក្នុងវត្ត ដោយ៤ម៉ោងពេទ្យពិនិត្យកំដៅម្តងហើយខាងក្រសួងសុខាភិបាលបានចុះមកយកកំហាករបស់ព្រះសង្ឃទាំង២៨អង្ ទៅពិនិត្យរួចអស់ហើយដែរ ហើយនៅថ្ងៃទី២២ ឬ ២៣ ៨ ២០២០ខាងមុខនេះខាងក្រសួងសុខាភិបាលនឹងអោយមន្ទីរសុខាភិបាលខេត្តធ្វើចលីស័កជាលើកទី២ទៅលើព្រះសង្ឃទាំង២៨អង្គគឺដើម្បីជាក់ច្បាស់ថែមទៀត៕ ផ្តល់សិទ្ធដោយកោះសន្តិភាព
