Sign In 
ឥណ្ឌូនេស៊ី បានប្រើយុទ្ធសាស្រ្តថ្មី ក្នុងការដាក់តាំងមឈូសនៅតាមទីសាធារណៈ ដើម្បីធ្វើការព្រមានទៅលើសេចក្តីស្លាប់ ដោយសារការរាលដាលជំងឺកូវីដ១៩ នៅក្នុងប្រទេសរបស់ខ្លួន។
អាជ្ញាធរនៅក្នុងរដ្ឋធានីនៃប្រទេសឥណ្ឌូនេស៊ី បានធ្វើការពិសោធន៍ ជាមួយនឹងវិធីសាស្ត្រដ៏តក់ស្លុតមួយនេះ ដើម្បីប្រយុទ្ធប្រឆាំងនឹងការរីករាលដាលរបស់កូវីដ១៩ ខណៈមានមនុស្សស្លាប់ច្រើន ដោយសារការរាលដាលជំងឺកូវិដ១៩ មានការកើនឡើងក្នុងចំនួនមួយដ៏ខ្ពស់នៅក្នុងតំបន់។
មឈូសត្រូវបានដាក់តាំងនៅចំណុចប្រសព្វដ៏មមាញឹក ក្នុងសង្កាត់មួយនៃទីក្រុងហ្សាកាតា ដែលជាចំណុចកណ្តាលនៃការផ្ទុះឡើងនៃវីរុសនេះនៅក្នុងប្រទេសឥណ្ឌូនេស៊ី។ មឈូសត្រូវបានលាបពណ៌ក្រហមនៅលើក្តារមឈូស ដែលនេះបង្ហាញពីការដាស់តឿនសាធារណជន ពីគ្រោះថ្នាក់របស់ជំងឺកូវីដ១៩។
លោក Djaharuddin ប្រធានផ្នែករងនៃ Mampang Prapatan ប្រចាំនៅហ្សាកាតា បាននិយាយថា ៖ «ការធ្វើបែបនេះ អាចនឹងជ្រុលបន្តិច ប៉ុន្តែនេះជាវិធីដែលយើងសង្ឃឹមថា នឹងលើកកម្ពស់ការយល់ដឹង។ ករណីឆ្លងកើនឡើងពីមួយថ្ងៃទៅមួយថ្ងៃ ប៉ុន្តែមនុស្សនៅតែមិនអើពើនឹងការអំពាវនាវរបស់អាជ្ញាធរ។
ប្រទេសឥណ្ឌូនេស៊ី បានឆ្លងដល់មនុស្សចំនួន ១៤៣,០០០ នាក់ ហើយបានសម្លាប់មនុស្សជាង ៦,២០០នាក់។ អាជ្ញាធររំពឹងថា តាមរយៈការដាក់តាំងមឈូសនេះ នឹងជួយមនុស្សឱ្យប្រុងប្រយ័ត្នអំពីស្ថានភាពជំងឺនេះ ដូច្នេះពួកគេអាចផ្លាស់ប្តូរអាកប្បកិរិយាបាន៕ ដោយ៖ត្នោត
