Sign In 
ប្រេស៊ីល ៖ ក្រុមអ្នកតវ៉ាជនជាតិដើមភាគតិចរបស់ប្រេស៊ីល បានដករបាំងរបស់ពួកគេចេញពីផ្លូវធំមួយក្នុងទីក្រុងអាម៉ាហ្សូន នៅថ្ងៃពុធ ដើម្បីអនុញ្ញាតឱ្យរថយន្តដឹកទំនិញធន់ធ្ងន់ឆ្លងកាត់។ ប៉ុន្តែគេគំរាមថា នឹងបិទផ្លូវម្តងទៀត។ ប្រជាជនជនជាតិ Kayapó Mekragnoti បានព្រមានថា ពួកគេនឹងបិទផ្លូវម្តងទៀតនៅព្រឹកថ្ងៃព្រហស្បតិ៍នេះ ដើម្បីបន្តការតវ៉ារបស់ពួកគេប្រឆាំងនឹងការខ្វះខាតក្នុងការឆ្លើយតបនឹងជំងឺកូវីដពីសំណាក់រដ្ឋាភិបាល។
ជនជាតិដើមប្រេស៊ីល បានប្រឆាំងនឹងដីការបស់តុលាការកាលពីថ្ងៃអង្គារ៍ និងបានបិទផ្លូវធំជាលើកទី២ ក្នុងរយៈពេល ២៤ម៉ោង បន្ទាប់ពីបានបើកវាជាមួយប៉ូលិសសហព័ន្ធកាលពីព្រឹកថ្ងៃម្សិលមិញ។ យោងតាមវិទ្យាស្ថាន Kabu ដែលជាអង្គការក្រៅរដ្ឋាភិបាលមួយបានបង្កើតឡើង ដើម្បីគ្រប់គ្រងភូមិជនជាតិដើមភាគតិច និងក្រុមអ្នកតវ៉ា បានទាមទារឱ្យមានជំនួយសុខភាពការផ្គត់ផ្គង់វេជ្ជសាស្ត្រ និងស្បៀងអាហារ ដើម្បីប្រយុទ្ធប្រឆាំងនឹងការរាតត្បាតរបស់កូវីដ និងការបញ្ចប់ការកាប់បំផ្លាញព្រៃឈើ និងសកម្មភាពខុសច្បាប់នៅក្នុងទឹកដីរបស់ពួកគេ។
ករណីឆ្លងវីរុសកូវីដដំបូងបង្អស់ក្នុងចំណោមជនជាតិភាគតិចប្រេស៊ីល បានកើតឡើងដោយសារការទាក់ទងជាមួយប្រជាជននៅទីក្រុង និងវត្តមានរបស់អ្នករុករករ៉ែខុសច្បាប់នៅក្នុងដែនបម្រុងរបស់ពួកគេ។ 
យ៉ាងហោចណាស់ ជនជាតិដើមភាគតិច ២១,០០០នាក់នៅប្រេស៊ីលបានឆ្លងវីរុសកូវីដ១៩ ហើយមនុស្សជាង ៦០០នាក់បានបាត់បង់ជីវិត ។ នេះបើយោងតាមការអះអាងរបស់ជនជាតិដើមនៃប្រទេសប្រេស៊ីល (APIB)៕ ផ្ដល់សិទ្ធដោយ៖ កោះសន្តិភាព
