Sign In 
ខេត្តមណ្ឌលគិរី ៖ អ្នកទេសចរណ៍រាប់ម៉ឺននាក់បានទៅលេងកម្សាន្តលើទឹកដីខេត្តមណ្ឌលគិរី តែជាការកត់សម្គាល់ភាគតិចណាស់ ដែលមានអ្នកពាក់ម៉ាស់ការពារការចម្លងជំងឺកូវីដ ១៩ ដែលផ្ទុយពីការណែនាំនិងជូនដំណឹងរបស់ក្រសួងសុខាភិបាល។
លោក ស្វាយ សំអ៊ាង អភិបាលខេត្តមណ្ឌលគិរី មានប្រសាសន៏ថា បញ្ហាកូវីដ១៩ ចំពោះភ្ញៀវមកលេងខេត្ត គឺអាជ្ញាធរខេត្តបានចាត់តាំងក្រុមពិនិត្យវាស់កំដៅ បាញ់អាកុល និងជែល។ ល។ ដល់ភ្ញៀវនៅតាមគោលដៅសំខាន់ៗដូចជា ទីតាំងវប្បធម៌ភ្នំដោះក្រមុំ, សមុទ្រឈើ, ទឹកជ្រោះប៊ូស្រា, អូរមីស និងបានចាត់មន្រី្តចុះណែនាំដល់ម្ចាស់សណ្ឋាគារ ផ្ទះសំណាក់ឱ្យរៀបចំមានការប្រុងប្រយ័ត្នចំពោះភ្ញៀវ ត្រូវបាញ់អាកុលជែល និងរក្សាអនាម័យ គម្លាត តុ កៅអី គ្រប់ពេលបរិភោគអាហារ។
យោងទៅតាមការបញ្ជាក់របស់មន្ទីរទេសចរណ៍ខេត្តបានឲ្យដឹងថា គិតត្រឹមល្ងាចថ្ងៃទី១៩ ភ្ញៀវទេសចរដែលមកទស្សនាកម្សាន្តក្នុងខេត្តមណ្ឌលគិរី ឈប់សម្រាក់សងជំនួសថ្ងៃបុណ្យចូលឆ្នាំថ្មីនេះ មានភ្ញៀវទេសចរសរុប ១០.១៨៧នាក់ ក្នុងនោះ ទេសចរជាតិ ១០.១២០នាក់ និងទេសចរ បរទេស ៦៧នាក់។ ក្នុងឱកាសឈប់សម្រាក់សងជំនួសថ្ងៃបុណ្យចូលឆ្នាំថ្មី អាជ្ញាធរខេត្ត និងមន្ត្រីជំនាញ បានចុះផ្សព្វផ្សាយដល់ភ្ញៀវទេសចរដែលមកទស្សនាកំសាន្តនៅតាមបណ្តារមណីយដ្ឋានទាំងអស់ក្នុងខេត្តមណ្ឌលគិរី ឱ្យមានការចូលរួមអនុវត្តតាមការណែនាំរបស់ក្រសួងសុខាភិបាល ក្នុងការទប់ស្កាត់ការឆ្លងជំងឺកូវីដ១៩ រលកទី២៕ ដោយ៖ ត្នោត
