កងកម្លាំងចម្រុះដឹកនាំដោយអាមេរិក​ បានថ្លែងថា យន្តហោះយោធា​មួយគ្រឿង​របស់អាមេរិក ​បានធ្លាក់​ចូលក្នុងបន្ទាយ​យោធា នៅក្នុងប្រទេសអ៊ីរ៉ាក់​ នាភាគខាងជើង​រដ្ឋធានីបាដាដ កាលពីថ្ងៃទី៨ ខែមិថុនា ឆ្នាំ២០២០។ 

សារព័ត៌មាន Stripes បានផ្សាយ​ នៅថ្ងៃទី៩ ខែមិថុនាថា ហេតុការណ៍​នេះ មិនបណ្តាលឲ្យគ្រោះថ្នាក់ដល់អាយុជីវិតនោះឡើយ ។ 

អ្នកនាំពាក្យកងកម្លាំងចម្រុះដឹកនាំដោយអាមេរិក ​​នៅអ៊ីរ៉ាក់ Myles Caggins បានប្រាប់​សារព័ត៌មាន AP ថា យន្តហោះយោធា ប្រភេទ C-130 បានធ្លាក់​នៅ​មូលដ្ឋាន Taji ប្រទេសអ៊ីរ៉ាក់ បណ្ដាលឲ្យរបួស​ទាហាន​៤នាក់។ បច្ចុប្បន្ន​ពួកគេ​កំពុងស្ថិតក្នុងការព្យាបាល នៅមន្ទីរពេទ្យ​យោធា ​Taji ហើយមិនមានអ្នករងរបួស​ណាម្នាក់ ​ក្នុងចំណោមពួកគេ រងការគំរាមកំហែងដល់អាយុជីវិតនោះទេ ។ 

ប្រភពព័ត៌មានដដែល បានបន្ដថា យន្តហោះបានរត់ហួសផ្លូវ ជ្រុលទៅ​បុក​ជញ្ជាំង បណ្ដាលឲ្យខូចខាតយន្តហោះ និងបង្កអគ្គិភ័យ​ទ្រង់ទ្រាយតូច ។ ឧប្បត្ដិហេតុនោះ គឺពុំមានការសង្ស័យពាក់ព័ន្ធនៅក្នុងហេតុការណ៍ណាមួយនេះទេ ។ ទោះជាយ៉ាងណា ការស៊ើបអង្កេត​បន្ថែម ក៏កំពុងតែដំណើរការ៕ ប្រែសម្រួលដោយ៖ thach yat

from： https://tnaot.com/km/m/detail/article/9353848