ភ្នំពេញ: បុរសជនជាតិចិនម្នាក់បើករថយន្តម៉ាក Range Rover ស៊េរីទំនើបមួយគ្រឿងបោះពួយក្នុងល្បឿនលឿនដូចហោះជ្រុលទៅបុកក្បាលព្រួញពុះចែកទ្រូងផ្លូវពេញទំហឹងបណ្ដាលឲ្យក្រឡាប់ផ្ងាជើងម្ខាងឯរថយន្តបែកម៉ានស៊ីនខូចខាតស្ទើរទាំងស្រុង តៃកុងរងរបួសធ្ងន់។

 ហេតុការណ៍នេះកើតឡើងកាលពីវេលាម៉ោង០១យប់រំលងអាធ្រាត្រឈានចូលថ្ងៃទី១៥ ខែសីហាឆ្នាំ២០២០ ស្ថិតនៅចំណុចស្តុបចំការមន តាមបណ្តោយផ្លូវព្រះនរោត្តម ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឲ្យដឹងថាមុនកើតហេតុគេឃើញបុរសជនជាតិចិនម្នាក់បើករថយន្តស៊េរីទំនើបម៉ាកRange Roverពណ៌ខ្មៅមួយគ្រឿងពាក់ស្លាកលេខភ្នំពេញ2AL-2721ធ្វើដំណើរទិសដៅពីត្បូងទៅជើងបោះពួយក្នុងល្បឿនលឿនដូចហោះលុះដល់ចំណុចកើតហេតុខាងលើបានរេចង្កូតទៅខាងឆ្វេងដៃជ្រុលទៅបុកក្បាលព្រួញពុះចែកទ្រូងផ្លូវពេញទំហឹងបណ្តាលបាក់អស់មួយកង់ ឯរថយន្តក្រឡាប់ផ្ងារជើងម្ខាងនិងបែកម៉ាស៊ីនរងការខូចខាតស្ទើរទាំងស្រុង និងបន្សល់ទុកនូវលុយដុល្លារមួយចំនួននៅក្នុងរថយន្ត។រីឯតៃកុងរងរបួសធ្ងន់ត្រូវបានរថយន្តសង្គ្រោះបន្ទាន់ដឹកយកទៅសង្គ្រោះនៅឯមន្ទីរពេទ្យភ្លាមៗ។

.ក្រោយកើតហេតុសមត្ថកិច្ចមូលដ្ឋានបានចុះមកដល់បានទំនាក់ទំនងទៅសមត្ថកិច្ចជំនាញចុះមកធ្វើការវាស់វែងយករថយន្តបង្កទៅរក្សាទុកនៅការិយាល័យចរាចរផ្លូវគោករាជធានីភ្នំពេញរង់ចាំធ្វើការដោះស្រាយគ្នានៅពេលក្រោយ៕ដោយ ផេង ភាព

from： https://tnaot.com/km/m/detail/article/9590792