Sign In 
អន្តរជាតិ ៖ Manny Pacquiao នៅតែចង់ជួបគ្នាម្តងទៀតជាមួយ Floyd Mayweather ដែលប្រកាសចូលនិវត្តន៍កាលពីឆ្នាំ២០១៧ ខណៈដែលរូបគេចង់ធ្វើការប្រកួតចុងក្រោយចំនួន២ ឬ៣លើកទៀត មុនពេលប្រកាសចូលនិវត្តន៍។
ស្តេចប្រដាល់ហ្វីលីពីនវ័យ ៤១ឆ្នាំរូបនេះ បានចាញ់ក្នុងការប្រយុទ្ធដែលរកចំណូលបានច្រើនបំផុតក្នុងប្រវត្តិសាស្ត្រប្រដាល់សកលកាលឆ្នាំ២០១៥ ដោយត្រូវស្តេចប្រដាល់អាមេរិក Mayweather វ័យ ៤៣ឆ្នាំយកឈ្នះដោយពិន្ទុ។
គ្រូបង្វឹករបស់ Pacquiao លោក Freddie Roach បានថ្លែងប្រាប់គេហទំព័រ BoxingScene ថា «អ្វីដែលគេ (Pacquiao) ចង់បានបំផុតគឺ ការជួប Mayweather ម្តងទៀត។ គេចង់ត្រឡប់ទៅកាន់ការប្រកួតឡើងវិញម្តងទៀត ២ ឬ ៣លើកចុងក្រោយ មុនប្រកាសចូលនិវត្តន៍។ ហើយបន្ទាប់មកប្រហែលជាគេនឹងប្រឡូកចូលឆាកនយោបាយ ដើម្បីឈរឈ្មោះជាប្រធានាធិបតីនៃប្រទេសរបស់គេ»។
សូមរំលឹកថា ជំនួបរវាងកំពូលកីឡាករទាំងពីរ កាលពីថ្ងៃទី២ ខែឧសភា ឆ្នាំ២០១៥ នៅទីក្រុង Las Vegas សហរដ្ឋអាមេរិក បានក្លាយជាការប្រកួតដែលរកប្រាក់ចំណូលច្រើនបំផុតក្នុងប្រវត្តិសាស្ត្រកីឡាប្រដាល់ ដោយអាចរកបាន ៨៨៥លានដុល្លារអាមេរិក៕ ផ្តល់សិទ្ធិដោយ៖ កោះសន្តិភាព
