Sign In 
អង់គ្លេស ៖ ខ្សែបម្រើ Mesut Ozil របស់ក្រុមកាំភ្លើងធំ Arsenal បាននិយាយថា គេនឹងនៅជាមួយក្លិបមានមូលដ្ឋានក្នុងទីក្រុងឡុងដ៍មួយនេះ រហូតដល់ថ្ងៃចុងក្រោយនៃកិច្ចសន្យារបស់ខ្លួននៅខែមិថុនា ឆ្នាំ ២០២១។
អតីតសមាជិកក្រុមជម្រើសជាតិអាល្លឺម៉ង់វ័យ ៣១ឆ្នាំរូបនេះ មិនបានបង្ហាញខ្លួនសម្រាប់ Arsenal ចាប់តាំងពីក្របខ័ណ្ឌ Premier League ត្រឡប់មកវិញកាលពីខែមិថុនា ក្រោមការដឹកនាំរបស់គ្រូបង្វឹកអេស្ប៉ាញលោក Mikel Arteta។ កីឡាកររូបនេះ បានថ្លែងប្រាប់ទៅកាន់គេហទំព័រ theathletic ថា «អ្វីៗគឺមានការលំបាក ប៉ុន្តែខ្ញុំស្រឡាញ់ Arsenal។ ខ្ញុំនឹងសំរេចចិត្តនៅពេលដែលខ្ញុំចង់ទៅ មិនមែនអ្នកដទៃជាអ្នកកំណត់នោះទេ។ ខ្ញុំនឹងផ្តល់អ្វីៗគ្រប់យ៉ាងដែលខ្ញុំមានសម្រាប់ក្លិបនេះ។ ស្ថានភាពបែបនេះ នឹងមិនធ្វើឱ្យខ្ញុំខកចិត្តទេ។ ប៉ុន្តែវាកាន់តែធ្វើឱ្យខ្ញុំប្រឹងប្រែងខ្លាំងជាមុន។ ខ្ញុំបានបង្ហាញវាកាលពីអតីតកាល ហើយខ្ញុំអាចត្រឡប់មកក្រុមវិញ ហើយខ្ញុំនឹងបង្ហាញវាម្តងទៀត»។
សូមរំលឹកថា Mesut Ozil ដែលបានចូលរួមជាមួយក្រុម Arsenal ក្នុងតម្លៃ ៤២,៤លានផោនពីក្លិប Real Madrid ក្នុងឆ្នាំ២០១៣ បានបាត់បង់ការពេញចិត្តក្រោមការដឹកនាំរបស់អតីតគ្រូបង្វឹកចាស់គឺលោក Unai Emery។
ក្រោយការតែងតាំងលោក Mikel Arteta កាលពីខែធ្នូ ឆ្នាំ២០១៩ Ozil បានចាប់ផ្តើមការប្រកួត Premier League ទាំង ១០លើករបស់ Arsenal ភ្លាមៗមុនពេលផ្ទុះឡើងការឆ្លងរាលដាលនៃវីរុសកូវីដ១៩ ដែលបានបង្ខំឱ្យផ្អាកលីគរយៈពេល ៣ខែកាលពីខែមីនា។ ប៉ុន្តែបន្ទាប់ពីបាល់ទាត់ត្រឡប់មកវិញ រូបគេមិនបានបង្ហាញខ្លួននៅក្នុងការប្រកួតចំនួន ១៣លើកកន្លងមករបស់ Arsenal គ្រប់កម្មវិធីទាំងអស់។ ដែលនាំឱ្យមានពាក្យចចាមរ៉ាមជាច្រើនថា គេនឹងចាកចេញពី Arsenal ទៅក្លិបនេះ ក្លិបនោះ៕ ផ្តល់សិទ្ធិដោយ៖ កោះសន្តិភាព
