Sign In 
ព្រៃវែង៖ ក្មេងតូចៗ៣នាក់ បានស្លាប់នៅក្រោមគំនរឥដ្ឋយ៉ាងអណោចអធ័ម កាលថ្ងៃទី៣ ខែមិថុនា ឆ្នាំ២០២០ វេលាម៉ោងរសៀល នៅចំណុចផ្ទះល្វែងជាន់ផ្ទាល់ដី (កំពុងសាងសង់ថ្មី) ខាងកើតវត្តឬស្សីសាញ់ សង្កាត់ព្រៃស ខណ្ឌដង្កោ រាជធានីភ្នំពេញ។
តាមរបាយការណ៍សមត្ថកិច្ចបានឱ្យថា ក្មេងទាំង៣នាក់នោះ ទៅក្បែរជញ្ជាំងឥដ្ឋពេលឪពុកម្តាយរបស់ពួកគេឡើងទៅធ្វើការនៅជាន់លើ សុខៗស្រាប់តែវារលំសង្កត់ពីលើស្លាប់តែម្តង។
ក្មេងរងគ្រោះទី១ ឈ្មោះ ឆេង ញ៉ ភេទប្រុស អាយុ៧ឆ្នាំ ទី២ ឆេង ចំរើន ភេទស្រី អាយុ២ឆ្នាំ មានឪពុកឈ្មោះ ម៉េង នី អាយុ៤២ឆ្នាំ និងម្តាយឈ្មោះ ព្រុំ ហួន អាយុ ៤៣ឆ្នាំ មានទីលំនៅបច្ចុប្បន្ន នៅភូមិសំនយ ឃុំសេនារាជឧត្តម ស្រុកព្រះស្ដេច ខេត្តព្រៃវែង (ជាជាងសំណង់រៀបឥដ្ឋ)
និងសពក្មេងទី៣៖ ឈ្មោះ ម៉េង ទូច ភេទស្រី អាយុ៣ឆ្នាំ មានឪពុកឈ្មោះ ម៉ាប់ ឡុង អាយុ២៨ឆ្នាំ និងម្តាយឈ្មោះ ឆេង នាង អាយុ ២៧ឆ្នាំ មានទីលំនៅបច្ចុប្បន្ន នៅភូមិសំនយ ឃុំសេនារាជឧត្តម ស្រុកព្រះស្ដេច ខេត្តព្រៃវែង (ជាជាងសំណង់រៀបឥដ្ឋ)។
សពក្មេងរងគ្រោះទាំង៣នាក់ បានដឹកដល់ស្រុកកំណើតនៅស្រុកព្រះស្តេច ខេត្តព្រៃវែងព្រឹកថ្ងៃទី៤ ខែមិថុនា ឆ្នាំ២០២០នេះហើយ ដើម្បីធ្វើបុណ្យតាមប្រពៃណី៕ ដោយ៖ ប៊ុនធឿន
