មន្រ្ដីយោធាជាន់ខ្ពស់រុស្ស៊ី បានថ្លែង កាលពីថ្ងៃទី១ ខែមិថុនា ថា កងទ័ពរុស្ស៊ី នឹងមិនធ្វើសមយុទ្ធយោធា នៅជិតប្រទេសជាសមាជិកអង្គការណាតូនោះទេ នៅឆ្នាំនេះ ហើយនេះក៏ជាការបន្ធូរបន្ថយស្ថានការណ៍ តានតឹងជាមួយអាមេរិក និងសម្ពន្ធមិត្តរបស់អាមេរិក។

សារព័ត៌មាន Interfax បានចេញផ្សាយ នៅថ្ងៃទី២ ខែមិថុនា ថា លោកឧត្ដមសេនីយ៍ Sergei Rudskoy ប្រធាននាកដ្ឋានប្រតិបត្ដិការដ៏សំខាន់របស់រុស្ស៊ី បានចោទប្រកាន់​សហរដ្ឋអាមេរិក និងសម្ពន្ធមិត្តណាតូ កំពុងតែបន្ដលេងល្បែងសង្គ្រាម នៅជិតព្រំដែនរបស់រុស្ស៊ី។ អង្គការណាតូ បានដាក់សំណើលើសំណើរបស់រុស្ស៊ី​ ទាមទារឲ្យមានកម្រិតសកម្មភាពយោធាទៅវិញទៅមក។

លោកឧត្ដមសេនីយ៍ បានបញ្ជាក់ថា យើងនឹងបន្ដបន្ធូរបន្ថយនូវស្ថានការណ៍ នៅក្នុងតំបន់អឺរ៉ុប។ ក្នុងឆ្នាំនេះ រុស្ស៊ី នឹងមិនមានផែនការណាមួយ ដើម្បីធ្វើសមយុទ្ធ នៅជិតព្រំដែនប្រទេសជាសមាជិករបស់អង្គការណាតូ​នោះឡើយ។ ប៉ុន្ដែរុស្ស៊ី នឹងធ្វើសមយុទ្ធយោធាទ្រង់ទ្រាយ ឈ្មោះ «Kavkaz-2020» នៅខែកញ្ញា ចូលជ្រៅមកក្នុងប្រទេស។ រីឯកន្លែងសម្រាប់ធ្វើសមយុទ្ធនោះ ក៏បានត្រៀមរួចរាល់អស់ហើយ ដោយមានទាំងកងទ័ព មកពីប្រទេសលោកខាងលិចចូលរួមផងដែរ។

លោកឧត្ដមសេនីយ៍ បានចង្អុលបង្ហាញការធ្វើសមយុទ្ធ កាលពីពេលថ្មីៗនេះរបស់អង្គការណាតូ នៅក្នុងសមុទ្រ Barents  គឺជាលើកដំបូង ចាប់តាំងពីសង្គ្រាមត្រជាក់ ក៏ដូចជា ការបង្កើនការហោះហើរយន្ដហោះ​ទម្លាក់គ្រាប់បែក​យុទ្ធសាស្ត្រ មានសមត្ថភាពបំពាក់នុយក្លេអ៊ែរ នៅក្បែរព្រំដែនរុស្ស៊ី និងជើងហោះហើរស៊ើបការណ៍របស់សហរដ្ឋអាមេរិក នៅជិតមូលដ្ឋានកងទ័ពរុស្ស៊ី នៅក្នុងប្រទេសស៊ីរី ជាដើម។

បើតាមទីភ្នាក់ងារសារព័ត៌មាន AP បានរាយការណ៍ថា លោកឧត្ដមសេនីយ៍ Rudskoy បានស្ដីបន្ទោសទៅលើអាមេរិក និងសម្ពន្ធមិត្ដ បន្ដចង់បំផ្លាញសន្ដិសុខ នៅក្នុងតំបន់អឺរ៉ុប ក្រោមលេសទប់ស្កាត់ការឈ្លានពាន​របស់រុស្ស៊ី៕ ប្រែសម្រួលដោយ Nuon

from： https://tnaot.com/km/m/detail/article/9304163