Sign In 
ប្រាសាទបេងមាលា មានទីតាំងស្ថិតនៅភូមិបេងមាលា ឃុំបេងមាលា ស្រុកស្វាយលើ ខេត្តសៀមរាប។ ប្រាសាទនេះ ស្ថិតនៅខាងកើតជើងភ្នំគូលែន និងខាងកើតក្រុងសៀមរាប លើចម្ងាយផ្លូវប្រហែល៧៧គីឡូម៉ែត្រ។ ប្រាសាទនេះ មានរចនាប័ទ្មដូចទៅនឹងប្រាសាទអង្គរវត្តដូច្នោះដែរ ដែលអាចឲ្យគេដឹងបានថា ជាប្រាសាទដែលកសាងក្នុងរាជ្យព្រះបាទសូរ្យវរ្ម័នទី២ នៅចុងសតវត្សរ៍ទី១១ ដើមសតវត្សរ៍ទី១២ ឧទ្ទិសដល់ព្រហ្មញ្ញសាសនា។ ទោះជាមានភាពប្រហាក់ប្រហែលទៅនឹងប្រាសាទអង្គរវត្តក៏ពិតមែន ប៉ុន្តែគេមិនអាចដឹងកាលបរិច្ឆេទពិតប្រាកដនៃឆ្នាំដែលកសាងប្រាសាទបេងមាលាឡើយ ព្រោះហេតុថាគ្មានសិលាចារឹកបញ្ជាក់។
បច្ចុប្បន្ន ប្រាសាទនេះមានការខូចខាតស្ទើរតែទាំងស្រុងទៅហើយ ដោយយើងឃើញមាននូវគំនរបាក់បែកជ្រុះធ្លាក់របា៉ត់រប៉ាយនៃថ្មដែលដូនតាបានយកមកកសាងប្រាសាទ។ ប៉ុន្តែទោះជាយ៉ាងនេះក្ដី ក៏ប្រាសាទបុរាណដ៏ចំណាស់មួយនេះនៅតែអាចទាក់ទាញភ្ញៀវទេសចរទៅទស្សនាមិនដែលដាច់ឡើយ។ ដោយសារតែសម្រស់នៃប្រាសាទដែលហ៊ុំព័ទ្ធដោយព្រៃឈើ ព្រមទាំងការធ្វើផ្លូវដើរអំពីឈើ បានរួមចំណែកបង្កើនភាពទាក់ទាញមួយកម្រិតទៀតដល់ភ្ញៀវទេសចរឲ្យចង់ទៅទស្សនា ជាពិសេសគឺផ្តិតយកទិដ្ឋភាពដ៏ស្រស់ស្អាតនៃប្រាសាទនេះ។
ក្រៅពីសំណង់ដ៏មហិមានៃប្រាសាទ និងស្ពានឈើ ប្រាសាទបេងមាលាក៏បានបន្សល់ទុកនូវចម្លាក់ដ៏ល្អវិចិត្រដែលជាស្នាដៃមានតម្លៃមហាសាលរបស់បុព្វបុរសខ្មែរយើងផងដែរ។ ចម្លាក់នៃប្រាសាទនេះនិយាយទាក់ទងទៅនឹងទេវកថានៅក្នុងព្រហ្មញ្ញសាសនា ដែលកាលគ្រានោះខ្មែរយើងមានជំនឿយ៉ាងមុតមាំទៅលើព្រហ្មញ្ញសាសនា។
ដើម្បីអានព័ត៌មានបន្ថែមទៀត សូមចុចលើតំណភ្ជាប់មួយនេះ៖ https://bit.ly/36ReKcN
ប្រភព៖ https://bit.ly/3cg3ibB
