គិតមកដល់ថ្ងៃទី​២៩ ខែឧសភានេះ ថៃមានអ្នកឆ្លងកូវីដ១៩ សរុប ៣០៧៦នាក់ និងស្លាប់ ៥៧នាក់​ ។ ក្នុងចំណោមអ្នកឆ្លងមានអ្នកព្យាបាលជាសះស្បើយ ហើយវិលត្រឡប់​ទៅផ្ទះវិញ មានរហូតដល់ទៅ២៩៤៥ នាក់ ។

បើតាមគម្រោង ​នៅដើមខែមិថុនា ខាងមុខនេះ ថៃ​នឹងបន្តបន្ធូរបន្ថយច្បាប់គ្រាមានអាសន្ន ដំណាក់កាលទី​៣ ហើយរដ្ឋាភិបាលមានគម្រោងលុបច្បាប់គ្រាមានអាសន្នទាំងស្រុង នៅថ្ងៃ ទី​១ ខែកក្កដា ។

នៅថ្ងៃទី​២៩ ខែឧសភា អគ្គលេខាធិការគណៈកម្មការសន្តិសុខជាតិថៃ ឧត្តមសេនីយ៍ Somsak Roongsita បានប្រកាសថា ​គម្រោងលុបច្បាប់គ្រាមានអាសន្ន ផ្តល់ការរស់នៅដល់ពលរដ្ឋ ដូចដើមវិញ នៅដើមខែកក្កដា​ឆ្នាំ​២០២០។

ឧត្តមសេនីយ៍ Somsak Roongsita បានប្រកាសឲ្យដឹងថា​ គម្រោងបើកប្រទេសឡើងវិញ មាន​៤ដំណាក់កាល ដែលត្រូវអនុវត្តក្នុងរយៈពេល​២ខែ ​។ មជ្ឈមណ្ឌលគ្រប់គ្រងទប់ស្កាត់កូវីដ​១៩ របស់រដ្ឋាភិបាលថៃ (CCSA) បានប្រកាសឲ្យដឹងថា បញ្ជីឈ្មោះបណ្តាលក្រុមហ៊ុន ដែលអនុញ្ញាតឲ្យបើកទ្វារឡើងវិញ នៅដើមខែមិថុនា បានរៀបចំរួចរាល់ហើយ នៅថ្ងៃទី​២៩ ខែឧសភានេះ។

ប៉ុន្តែដើម្បីទប់ស្កាត់ការឆ្លង ជាលើកទីពីរ ​ក្រសួងសុខាភិបាលថៃ មានវិធានការតាមដានតាមដាន និង អនុវត្តច្បាប់នៅគម្លាតពីគ្នា​ឲ្យបានល្អបំផុត​។ បើពលរដ្ឋមិនមានវិធានការការពារខ្លួនឯងនោះទេ​ អាចនឹងមានរលកឆ្លងកូវីដ ១៩ ជាលើកទីពីរ ជាមិនខានឡើយ៕ ប្រែសម្រួលដោយ៖​ MEO

from： https://tnaot.com/km/m/detail/article/9276837