ប្រធានាធិបតីហ្វីលីពីនលោក Rodrigo Duterte បានមានប្រសាន៍ថា លោកនឹងមិនអនុញ្ញាតឱ្យសិស្ស​ចូលសាលារៀនវិញទេរហូតទាល់តែមានវ៉ាក់សាំងការពារ​វីរុសកូវីដ-១៩សិន បើទោះបីជាមានប្រទេសខ្លះចាប់ផ្តើមរៀនដោយផ្ទាល់ក៏ដោយ។

សិស្សគ្រោងនឹងអនុញ្ញាតឱ្យចូលរៀនវិញនៅចុងខែសីហាបន្ទាប់ពីថ្នាក់រៀនសម្រាប់សិស្សបឋមសិក្សានិងមធ្យមសិក្សាជាង ២៥ លាននាក់ត្រូវបានបិទទ្វារនៅខែមីនា ដោយសារការឆ្លងរាលដាលបានផ្ទុះឡើងនៅប្រទេសហ្វីលីពីន។ ប៉ុន្តែនៅក្នុងសុន្ទរកថាមួយដែលចាក់ផ្សាយនៅល្ងាចថ្ងៃចន្ទប្រធានាធិបតីលោក Duterte បានមានប្រសាសន៍ថាហានិភ័យ​ដ៏ធំនោះគឺការឱ្យសិស្សចូលរៀនវិញ។​ ប្រធានាធិបតីបានបន្ថែមថា “ប្រសិនបើខ្ញុំមិនប្រាកដថាពួកគេពិតជាមានសុវត្ថិភាពនោះទេ ​ខ្ញុំមិនអនុញ្ញាតឱ្យពួកគេមានហានិភ័យដោយសារតែការប្រថុយបើកសាសារៀនវិញនោះឡើយ។ ​សម្រាប់ខ្ញុំវ៉ាក់សាំងជារឿងសំខាន់ណាស់។ ប្រសិនបើមានវ៉ាក់សាំង​ហើយនោះ​ ការបើកដំណើរការសាលារៀននឹងចាប់ផ្តើមភ្លាមៗ ”។

ទោះបីជាអ្នកស្រាវជ្រាវបានចាប់ផ្តើមកិច្ចខិតខំប្រឹងប្រែងជាសកលដែលមិនធ្លាប់មានពីមុនមកដើម្បីបង្កើតវ៉ាក់សាំងយ៉ាងឆាប់រហ័សក៏ដោយ ក៏មិនទាន់ឃើញ​ថាតើបេក្ខជនណាមួយដែលអាចទទួលបានជោគជ័យ​នោះទេ។ កម្មវិធីសិក្សានៃសាលារដ្ឋក្នុងប្រទេសហ្វីលីពីនជាធម្មតាចាប់ផ្តើមពីខែមិថុនាដល់ខែមេសា​ ប៉ុន្តែអាជ្ញាធរបានច្រានចោលសំណើ​បើកសាលា ខណៈពេលដែលមាន​ចំនួនអ្នកឆ្លងបានកើនឡើងហើយប្រទេសក៏កំពុងស្ថិតនៅក្នុងគ្រាអាសន្នដែល​ត្រូវចាក់សោរយ៉ាងតឹងរ៉ឹង​ផងដែរ។ ហ្វីលីពីនក៏បានរៀបចំកម្មវិធីសិក្សាពីចម្ងាយតាមរយៈប្រព័ន្ធអ៊ីនធឺណិតសម្រាប់សិស្សផងដែរ ដើម្បីជួយសម្រួលដល់ការសិក្សារបស់សិស្ស។ ផ្ទុយទៅវិញគេបានសង្កេតឃើញថាមានមនុស្សរាប់លាននាក់រស់នៅក្នុងភាពក្រីក្រ​នៅក្នុងប្រទេសហ្វីលីពីនហើយមិនមានលទ្ធភាពប្រើប្រាស់កុំព្យូទ័រនៅផ្ទះដែលជា​បញ្ហាសម្រាប់​ការរៀនពីចម្ងាយ។

ប្រទេសមួយចំនួនបានអនុញ្ញាតឱ្យដំណើរការសាលារៀនវិញហើយដែលមានដូចជាប្រទេសកូរ៉េខាងត្បូងនិងបារាំងជាដើម។ គិតមកត្រឹមថ្ងៃអង្គារនេះ ចំនួនអ្នកឆ្លងវីរុសកូវីដ-១៩នៅប្រទេសហ្វីលីពីនបានកើនឡើងដល់ ១៤៦៦៩នាក់​ និងមានមនុស្សស្លាប់ចំនួន ៨៨៦នាក់។

កែសម្រួលដោយ៖ ភារ៉ា

ប្រភព៖ Bangkok Post

from： https://tnaot.com/km/m/detail/article/9262001