នៅក្នុងហេតុការណ៍គ្រោះថ្នាក់ធ្លាក់យន្តះហោះដឹកអ្នកដំណើរ​១០៧នាក់ នៅក្នុងប្រទេសប៉ាគីស្ថាន មានអ្នកដំណើរពីរនាក់ នៅរស់មានជីវិតនៅឡើយ ក្នុងនោះ​មាន CEO  ធនាគារ​ Punjab (BOP) លោក​ Zafar Masud ។

នៅក្នុងសេចក្តីប្រកាសរបស់ធនាគារ BOP នៅលើបណ្តាញសង្គម Twitter បានឲ្យដឹង​ថា ប្រធានធនាគារ​ Zafar Masud មានភ័ព្វសំណាងល្អ បានរួចផុតពីសេចក្តីស្លាប់ នៅក្នុងគ្រោះថ្នាក់ធ្លាក់យន្តហោះ កាលពីថ្ងៃទី​២២ ខែឧសភា ឆ្នាំ២០២០។ នៅពេលនេះ លោក​ Zafar Masud កំពុងតែសម្រាកព្យាបាល នៅក្នុងមន្ទីរពេទ្យ ដោយមានមន្ត្រីក្នុងតំបន់បានទៅសួរសុខទុក្ខផងដែរ ។ លោក Zafar Masud បានរួចផុតពី​គ្រោះ​ថ្នាក់​ហើយ។

ក្រៅពីប្រធានធនាគារ ក៏នៅមានអ្នកដំណើរម្នាក់ទៀត មានឈ្មោះ​ Mohd Zubair ​ក៏នៅរស់រានមានជីវិតផងដែរ​ នៅក្នុងគ្រោះថ្នាក់​ដ៏រន្ធត់នោះ។ ក្នុងពេលគ្រោះថ្នាក់កើតឡើង លោកអភិបាលក្រុងការ៉ាជី បានប្រកាសថា អ្នកដំណើរនៅលើយន្តហោះទាំងអស់ អាចនឹងស្លាប់ ក្រោយពេលយន្តហោះផ្ទុះឆេះខ្ទេច។ ប៉ុន្តែបើតាមរូបភាពពីកន្លែងកើតហេតុ មានមនុស្សប្រមាណ​១៥-២០ នាក់ បានយកចេញពីគំនរបាក់បែក នៃយន្តហោះនោះ។

មូលហេតុដែលបណ្តាលឲ្យមានគ្រោះថ្នាក់នេះ គឺស្ថិតកំពុងស្រាវជ្រាវនៅឡើយ​។ យន្តហោះបានជួបគ្រោះថ្នាក់ ពេលកំពុងព្យាយាមចុះចត ​នៅអាកាសយានដ្ឋានការ៉ាជី​។ នៅលើយន្តហោះនោះ មានអ្នកដំណើរ​ចំនួន៩៩ នាក់ និង​ក្រុមអាកាសយានិក ចំនួន៨នាក់​ផងដែរ៕ ប្រែសម្រួលដោយ៖ MEO

from： https://tnaot.com/km/m/detail/article/9246670